تونس

 للمرّة المليار نعاودو : 


معارضة قيس سعيّد برموز النهضة و نجيب الشابي و جوهر مبارك و المرزوقي وإئتلاف الكرامة و قلب تونس و عبير موسي  مع إحترامي للناس المحترمين فيهم و المناضلين راو هو أحسن كادو تعطيوه لقيس سعيّد خاطر باش يقول هذومة يحبو يرجعو منظومة 24 جويلية الي يجيشي لبالكم تراه انو الشعب التونسي يفضل الوضع الحالي المأساوي على انو يرجع لمنظومة 24 جويلية .... و هذاكة علاه الكلمة السحرية هذي هي l’argument الوحيد الي قعد لقيس سعيد و الزقافنة الي يقففولو في البلاتوات . ونتصوّر انو الاختيار هذا موش اعتباطي أما مبني على عمليات سبر آراء دقيقة . 


يعني بهدوء التوانسة اليوم فيهم نسبة كبيرة مقتنعين بفشل قيس سعيّد و لكن يقولولك جهنم الحمراء و لا عودة المنظومة السابقة ... دونك انتوما كيف تتزعمو معارضة سعيّد راكم تعطيو فيه فيه هدية ذهبية . 

باهي شنوة الحلّ ؟ 


الحلّ ساهل ياسر ....  الاتفاق على برنامج لإنقاذ تونس يكون واضح المعالم و فيه النقاط التالية : 


* اعتماد دستور بلعيد 


* القبول بتوجيه الدعم للطبقة الوسطى و الفقيرة على خمسة سنوات


* بيع نسبة من جميع المؤسسات الفالسة و المدمرة للإقتصاد الوطني 


* استغلال النقود الي بعنا بيها لانتاج مشروع ضخم متاع طاقة شمسية و تحلية مياه البحر بالطاقة الشمسية و ضرب المساحات المزروعة في 10 لتأمين الأمن الغذائي و الإكتفاء الذاتي 


* ناخذو قروض باش نعملو بيها خمسة حاجات : 


- إصلاح التعليم باش تولي المدارس التونسية بعد عشرة سنين في نادي 40 دولة الأوائل في التعليم الإبتدائي


- إصلاح المستشفيات و إنشاء شراكة مع القطاع الخاص لتحويل تونس لقطب إفريقي طبي في تكوين  الاطباء و علاج المرضى 


- إصلاح النقل باش يكون عنا نقل من الطراز العالمي من هوني لعشرة سنين و ميسالش بالشراكة مع القطاع الخاص و تتحمل الدولة الدعم متاع النقل


- في خمسة سنين يكون في كل ولاية مساحة خضراء من الطراز العالمي فيها وين يتفرهدو الصغار و وين يمارسو الكبار الرياضة و مسرح و السينما و التعهد بعد عشرة سنين باش في كل ولاية نختارو زوز معتمديات نعملو فيهم نفس الشيء


- رقمنة الإدارة و القضاء  


* التعهد بإصلاح جذري للضرائب 


===> بعد الإتفاق على البرنامج هذا يتم الإتفاق على شخص واحد فقط يقود معارضة قيس سعيّد و يكون هو المرشح للرئاسة و يتعهد بتنفيذ المشروع هذا و طبعا و خاصة ما يكونش مالوجوه المحروقة متاع المنظومة السابقة وسيبوه يخرج راس راس مع قيس سعيّد مع الاختفاء التام لباقي الوحوه و وقتها يتحول النقاش من خونة مخدرات الاستقواء بالاجنبي السيادة الوطنية الضب الغراب و الثعلب الى حوار حول البرامج و وقتها نخرجو قيس سعيد من zone de confort متاعو لمربع الضعف متاعو .... و يتم المطالبة صباحا مساء بانتخابات رئاسية سابقة لأوانها على أساس دستور 2022 . 


يا ربي يا عالي أنا كمواطن بسيط ريقي شاح و تعبت و نتصوّر عملت الي عليا باش نعاون بلادي .... عاونني باش يحلو مخاخهم و يفهمو و السلام

Comments