الخوانجية

  في كل مرة تتكلم فيها هيئة الدفاع عن الشهيدين بلعيد و البراهمي إلا و يدخلوا الخوانجية في هستيريا كبيرة و في إرتباك كبير و باللوغة العامية نقولوا المجراب تهمزوا مرافقو ...

الإنسان النظيف و البريء و إلي موش عامل شيء مستحيل تكون ردة الفعل متاعو بالطريقة هذي ...

الناس الكل تعرف في عهد شكون كانوا الإرهابيين يتدربوا في الجبال و كانت وزارة الداخلية تقول أنهم شباب يمارسوا في الرياضة و ينحّيو في الكوليسترول ...

الناس الكل تعرف في عهد شكون تم تكوين جهاز الأمن الموازي و تم فتح المطار و حدود ليبيا لتسفير آلاف و آلاف الشباب المغرر بهم إلي سوريا و أصبحت تونس أول دولة مصدرة للدواعش في العالم ...

الناس الكل تعرف في عهد شكون وقع ذبح الجنود في الشعانبي و وقع زرع الألغام في الشعانبي و وقع حرق السفارة الأمريكية و وقع تهريب أبو عياض و غيرها من الجرائم ...

الناس الكل تعرف في عهد شكون تمت الإغتيالات و في عهد شكون توجدت الغرفة السوداء في وزارة الداخلية و  في عهد شكون تم إخفاء الوثيقة التي تحذر من إغتيال البراهمي ...

 الناس الكل تعرف في عهد شكون تم تكفير شكري بلعيد و الإعتداء عليه في المقهي و محاصرة المحكمة إلي كان يترافع فيها و قرصنة البريد الإلكتروني الخاص بيه ...

الناس الكل تعرف في عهد شكون قام الجيش الوطني بتأمين قبر شكري بلعيد بعد محاولة تدنيسه ثم تهشيم النصب التذكاري في المكان الّذي أُغتيل فيه ...

الناس الكل تعرف في عهد شكون تم سحل لطفي نقض و قتله أمام الجميع في وضح النهار و كل شيء موثق بالصوت و الصورة ...

التاريخ لا يرحم ....